ومن بعد كل ضيقٍ فرجاْ

عشن نعرف بجد أد ايه ربنا رحيم بعباده ..

قلبوا الذاكرة كدا وافتركو من يومين بس كانت حالتنا ازاي ؟!!
قصف ف غزة ، ومأساة في أسيوط ..

واتاملوا حالنا انهردة .. انتصر للمقاومة وفرض الهدنة على الإحتلال وأفراح في ربوع غزة 🙂
ومرسي يطلعلنا بقرارات جامدة جدا ويثلج صدورنا فعلاً بقرار “اعادة المحاكمات” دا بالذات ..
وشال “النائب العام” اللي كان زي القدر متبت ف المنصب ..

ربي لك الحمد كما ينبغي لجلال وجهك ولعظيم سلطانكــ<3
وربنا يديم علينا الفرحة والهدوء وراحة البال 🙂

*عفآفْ~
~ روحٌ حالمةْْ

قطر الموت | حقيقة واقعية في أسيوط !

قطر الموت ..
المصطلح دا لما كان بيتذكر ، كان بيمثل في أذهان الناس قطر الموت اللي فـ “دريم بارك” اللي الناس بتقعد تتحدى بعض وتفرد عضلاتها وشجاعتها ع بعض بيها .
كل واحد فاكر نفسه قلبه جامد ويتحدى الصعاب ، ويتحدى الموت ، يفتخر بينفسه ويقول ” يااااه أنا بعشق قطر الموت ، اما انتو جبناء وخوافين 😛 “

لكن ما حدش كان يتخيل ف يوم ان “قطر الموت” دا يطلع حاجة حقيقية بجد ، واسم على مسمى فعلاً ، وان اللي بيدخله لازم يكون فعلاً قد التحدي ، ومش ماوي ع طلوع تاني .
لأول مرة نشوف فعلاً “قطر الموت” ، ومش بس كدا ، لأ دا نحسه كمان ، ونصدقه أوي ونفهم معناه !

بيقولك : كان في طفل صاحي من النوم ، صلى الصبح وفطر ، باس على ايد مامته وقالها “أنا بحبك أد السماء وأد الدنيا دي كلها” ❤
طلع يجري وكله حماس للعلم واللعب والقرآن ..
ركب الاوتوبيس ، شاف اصحابه وسلم عليهم ، واتفقوا هيعملوا ايه انهردة ف المدرسة ، ف حصة الألعاب وف الفسحة ، واتفقوا يروحوا سوا كمان !

وع الكرسي اللي جنبه بنوتة جميلة ، عملت نفس الحاجات دي بالظبط
وحواليهم ، وقدامهم ووراهم بنات وأولاد كتير في عزّ برائتهم وجمالهم وطهارتهم .. وكلهم راكبين سوا ، ومبسوطين سوا ، ومتحمسين للحياة.

على طرف الطريق ، كان في واحد عجوز ,, نايم وتعبان ، قام يريح شوية من كتر التعب جوا “الدشمة” بتاعته ..

وجاي من بعيد .. بسرعة مش عادية قطر كبيييير ، اللي الأطفال بيخافو بس من مجرد صفارته !
وفجاة كل الحاجات دي اتجمعت ف مكان واحد ووقت واحد ولحظة وحدة ، وبإرادة رب واحد !
– كلهم ؟!
– آه كلهم ، الا الغفير النايم ..
– طب ليه ؟؟ اشمعن هو ؟؟

– هو كدا .. عشن هو كدا ، عشن مكتوب ع البرائة هي اللي تروح ، والمهمل هو اللي يفضل ، وكمان يتهرب ويتنصل من دم الـ….
قصدي من كل الدم الكتير اللي مغرق الكراريس والمصاحف ، الشنط والكتب والمرايل ..

ومن بعيييييييييد أم وأب ، جايين بيجرو ، وشايفين أرواح الملايكة دي بترفرف لفوق ، للجنة .. أصلهم ما يستاهلوش يقعدوا هنا وسطينا ..

 

انا عارفة ان دي هلاوس ، وكلمات ركيكة جداً
بس ايدي اتكسفت المدونة تبقى فاضية ف الوقت دا بالذات !
وقالت ان فضفضة م القلب ملخبطة ، أحسن من ولا حاجة !

عفآفْ~
روحٌ حآلمةْ~